NAGA CITY- Maogma an pamayuhan kan Barangay Tabuco, Naga City makalihis na makaiba an saindang lugar sa Seal of Good Local Governance for Barangay 2025.
Sa entrevista kan Bombo Radyo Naga ki Elisa B. Carmona, Barangay Kapitan kan Tabuco, Naga City, sinaysay kaini na pigkundusir an awarding ceremony sa City Hally na pinangenotan ni Naga City Mayor Leni Robredo.
Sigun ki Carmona, an pagbisto na saindang nareseber an pagpapatotoo na dae napabayaan kan saindang lado an obligasyon ninda sa saindang barangay orog na sa mga kaakian.
Dugang pa kan opisyal, padagos an paglapigot kan Barangay Council kan Tabuco tanganing matabangan an saindang mga residente orog na an mga kaakian partikular sa saindang pag-aadal.
Apwera digde, mahigot man an mga panundunan na piglatag kan Barangay tanganing mamantinir an paz y orden sa saindang area siring na sana kan implementasyon kan curfew.
Paliwanag ni Carmona, sa panahon na ini dapat namomonitor kan mga magurang an mga ginigibo kan saindang mga aki para sa kasalbaduhan kan mga ini.
Sa ngunyan, nagpasalamat na sana an opisyal sa gabos na nagtarabangan tanganing magin posible an pagbisto na saindang nareseber.
