Nilinaw ni Department of Agriculture (DA) Secretary Francisco Tiu Laurel Jr. an naenot kaining suhestiyon dapit sa pagkakan kan manok komo alternatibo sa galunggong.
Ini an kasabay kan halangakw na presyo kan nasambitan ng sira na dating pigkonsiderar komo poor man’s fish.
Paglilinaw kan sekretaryo, nagbaba sa ngunyan an farm-gate price kan manok, kaya nakakatabang sa poultry industry kun mas tatangkilikon ini kan mga parabakal, orog na asin ibong-ibong an holiday gathering.
Ini soboot an enot na naglaog sa saiyang isip kan mabanggit kaining gibuhong alternatibo an karne kan manok sa sirang galunggong, kasabay man kan siayang pagmamawot na maglangkaw an demand sa poultry products.
Antes soboot an saiyang kontrobersiyal na pahayag, maabot sana sa P99 hasta P101 an farmgate price kan manok alagad nahilingan na nin bahagyang paglangkaw makalihis an saiyang pahayag.
Mientrastanto, kadakol man soboot an mga sira na mas barato kumparar sa galunggong na pwedeng gamiton komo alternatibo.
Kaibahan digde an tilapia, tamban, asin bangus na pawang igwang halangkaw na supply sa presente.
Sa presente, nag-aabot puon P240 hasta P360 an kada kilong presyo kan galunggong, na mas halangkaw kumparar sa P190 hasta P220 na kada kilong presyo kan karne kan manok.
