Ibinunyag ni Ombudsman Jesus Crispin ‘Boying’ Remulla na harani na nindang sangatan nin kaso sinda Senador Loren Legarda asin Batangas 1st District Rep. Leandro Leviste.
Sa nangyaring press conference kan Office of the Ombudsman, ibinugtak kan opisyal na asahan an posibleng pagsangat ninda nin maninigong kaso kontra sa mag-inang mambabatas.
Maski dai pa tinukoy an partikular na petsa o ‘timeline’ kun nuarin isasangat an kaso, susog ki Ombudsman Boying Remulla, segurado na ini saindang ihahain sa korte kan Sandiganbayan.
Alagad, nasa preliminary investigation stage na an reklamong kinakahampang kan mag-inang mambabatas sa tanodbayan.
Iaanunsyo na sana daa sa publiko o miyembro kan media sa oras na ihahain na kan tanodbayan an inimbestigaran asin inandam na kaso kontra ki Sen. Legarda asin Rep. Leviste.
Magigirumduman na imbuelto sinda Senador Loren Legarda asin Rep. Leandro Leviste sa sinasabing Solar Firm kaini na daing kakayahan daa na utubon an obligasyon na ‘Solar Energy’ para sa Pilipinas susog sa nakua nindang prangkisa.
