Ibinidad kan Israel na nagadan ninda si Read Saad, sarong halangkaw na commander kan Hamas, sa sarong targeted strike sa Gaza City kan nakalihis na Sabado.
Napag-araman na si Saad an namamayo sa paggibo kan armas kan Qassam Brigades, an militar na kapot kan Hamas, pigkokonsiderar na saro sa pinaka-imporanteng lider kan grupo asin igwang dakulang papael sa mga pag-atake sa Israel kan nakalihis na Oktubre 7.
Sigun sa Hamas-run Civil Defence, apat na tawo an binawian nin buhay sa strike, asin kadakol na iba pang mga tawo an irido.
Kinumpirmar man kan sarong lokal na opisyal kan Hamas na kaibahan sa mga binawian nin buhay si Saad asin an saiyang kaibahan na si Abu Imad al-Laban.
Sinaysay man kan IDF asin Shin Bet na si Saad an responsable sa pagkagadan kan kadakol na soldados sa Gaza dara kan mga pagbobomba.
Haloy na ining target kan Israel asin nagkapirang beses na soboot pinorbarang gadanon, kaibahan an sarong operasyon sa Gaza City kan nakalihis na Marso kun saen nakatakas si Saad.
Napag-araman an na naganap an strike sa parte kan Gaza na kontrolado kan mga Palestino, sa pig-aapod na Yellow Line, na nagbabanga sa Gaza makalihis an ceasefire kun saen an Israel an igwang kontrol sa sirangan na parte kan Gaza.
An pagkagadan ni Saad an naganap kasabay kan padagos na mga paghihingowa sa diplomasya sa irarom kan ng US-backed peace plan ni U.S. President Donald Trump.
Parte kan plano an pagbebweltada kan mga hostages na kinidnap kan Hamas kan nakalihis na Oktubre 7, asin ngunyan nakatuon an mga negosasyon sa disarmament kan Hamas asin liwat na pag-develop kan Gaza.
