NAGA CITY- Pigsaysay kan sarong abogado na posibleng maipasar an pigbubusol na mas mahigot na Anti-Political Dynasty bill sa nasyon.
Sa entrevista kan Bombo Radyo Naga ki Atty. Benjamin Guillermo B. Magadia, Law Professor, private practitioner, author, sinaysay kaini na kun hihilingon asin pag-aadalan an bill pabor pa man giraray ini sa mga politiko.
Marurumduman, pigsunad ninda House Speaker Faustino Dy III asin House Majority Leader Sandro Marcos an House Bill number 6771 na nagbabawal sa sabay-sabay o sunod-sunod na pagkapot kan anuman na posisyon sa gobierno kan mga magkakaparientes hasta sa ikaapat na antas, legitimate o illegitimate, asin half o full blood.
Sakop kaini an magurang, aki, magtugang, tiyuon, tiyaon, pamangkin, pinsan, asin iba pang nasa parehas na antas.
Sa prosopwesto ninda Dy asin Marcos, bawal man an pagdalagan o pagkapot nin posisyon kan mga common-law spouse, tanganing malikayan an anuman na paagi kan pag-ikot o pag-likay sa ley.
Para man sa mga kongresista, provincial, municipal asin baranggay official, siisay man sa saindang mga kaparientes an dae pwedeng magdalagan o magkapot nin pwesto sa kaparehas na distrito, provincial, municipal, city o barangay office.
Sa Senado man, dae tutugutan na sabay magtukaw an kabali sa sarong pamilya siring kan magtugang.
Paliwang pa ni Magadia an prosopwestong bill an igwang labot orog na ta kun susurion nin marhay adbentahe pa man giraray ini sa mga politiko.
Sa ngunyan, naglalaom na sana an nasambitan ng abogado na seryoso an presenteng administrasyon magin an gabos na government official kan nasyon na wakasan an deka-dekada nang isyu pag-abot sa political dynasty sa Pilinas.
