Sinaysay kan Armed Forces of the Philippines (AFP) na dae katubod-tubod an mga alegasyon na nagsanay sa Pilipinas an duwang suspek na pigkokonektar sa pambabadil sa Bondi Beach sa Australia, huli sa labi nang pagluya kan mga lokal na teroristang grupo.
Sigun ki AFP Chief of Staff Gen. Romeo Brawner Jr., nag abot sa Maynila kan nakalihis na Nobyembre 1 sinda Sajid Akram asin an aki kaining si Naveed Akram antes na nagpasiring sa Davao City, asin padagos pang bineberipika kan mga awtoridad an saindang mga hiro.
Sigun ki Brawner, dae tugma sa presenteng sitwasyon kan seguridad sa nasyon, orog na sa Mindanao, an mga espekulasyon manungod sa extremist training.
Gikan sa 1,257 lokal na terorista kan nakalihis na taong 2016, bumaba na sana sa poco mas o menos 50 an numero kan mga ini ngunyan na 2025 dara kan dagos-dagos na operasyon militar asin mga lakdang pangkatuninungan.
Dugang kan AFP, mayo nang nairehistrong terrorist training, recruitment o darakulang pag-atake gikan 2016, mantang nagrahay man an seguridad sa BARMM asin nagbaba an antas kan huma kan terorismo sa pirang parte kan Mindanao.
