Ipinagsugo kan Court of Appeals an paghali ki dating Negros Oriental Governor Henry Pryde Teves gikan sa resolution kan Anti-Terrorism Council na nag-uri sa saiya komo terorista.
Sa desisyon kan korte, napag-araman asin nagpagdeisyunang umakto nin may “grave abuse of discretion” an ATC kaiba an Anti-Money Laundering Council (AMLC) sa pag-isyu kan mga resolusyon na nag-uri ki Teves komo terorista nin mayong probable cause asin kalabisan sa pagpapautob nin ley laban sa terorismo.
Siringman, sinaysay kan korte na dae makatarungan an pag-freeze kan mga asset ni Henry Teves.
Binalikan kan CA an iprinisenta kan duwang konseho na mga testigo na nagsasabing imbwelto si Henry Teves sa soboot pagsasagibo nin pirang krimen siring kan mga paggadan, pagpoporbar na paggadan, pagbabanta asin harassments.
Alagad, sigun sa korte mayo ni saro sa mga iprinisentang testigo an may ano man na personal na kaaraman na si Teves an utak o nagsugo sa nasambitan ng mga krimen.
Gabos soboot kan mga testigo an igwa sana nin suspetsa, na base sa saindang paghuna na an mga biktima an karibal sa pulitika ni Teves, supporter kan kalaban sa pulitika o kritiko siring man an mga indibidwal na dae na susunod sa demand ni Teves tangani makakua o makahuthot nin kwarta.
Sigun pa sa CA, pwedeng resonable an pagsuspendir ki Teves para sa ibang krimen alagad bako man sa paagi na iniuri ini komo terorista.
Enot kaini, sa irarom kan ATC Resolution Number 43 na inaprubaran kan nakalihis na Hulyo 26, 2023, ti-nag kan konseho si Henry Teves kaiba an saiyang tugang na si dating Negros Oriental Congressman Arnie Teves at 11 iba pa komo mga terorista huli sa soboot pagbalgar sa pirang probisyon kan Anti-Terrorism Act.
