NAGA CITY- Mahigot an nagin pagbabantay kan Naga City Police Office kasabay kan Anibersaryo kan Communist Party of the Philippines ngunyan na aldaw, December 26, 2025.
Sa entrevista kan Bombo Radyo Naga ki Police Captain Daisy Angeles, PIO-NCPO, sinaysay kaini na igwang naka-stanby na personnel an saindang lado orog na para sa pagtatao nin seguridad sa publiko.
Katakod kaini, nag-abot sa nasa labi 200 na personnel an saindang pigdeploy tanganing magbantay.
Sigun pa ki Angeles, padagos na pigrerespeto sa lado kan mga kapulisan an derechos kan mga miyembro kan NPA na magsagibo nin rally alagad kaipuhan na siertuhon na ini an sa matuninong na paagi tanganing malikayan an mga darakulang problema.
Pigtawan duon pa kan opisyal na yaon an saindang pag-acknowledge sa saloobin kan mga NPA alagad kaipuhan man na siertuhon na dae ini pagpupuonan nin dakulang kariribukan.
Sa ngunyan, pig-asegurar na sana ni Angeles na pirmeng yaon an saindang lado tanganing magtaong proteksyon sa publiko gikan sa mga nakri-krian nin huma sa komunidad.
