NAGA CITY – Mahigot an pagbabantay kan BFP Libmanan sa mga paratienda nin paputok sa nasambitan na lugar.
Sigun ki FO2 Patrimar C. Maravilla Public Information Officer, BFP Libmanan all accounted na an preparasyon sa Libmanan ngunyan na papaabuton an Bagong taon.
Kada aldaw nagkakaigwa nin bandilyo dapit sa Online Iwas sa Paputok asin gabos na Barangay an pigdudumanan kan mga otoridad huli ta parte ini kan mandato sa sainda tanganing magin salbado an pagselebrar kan Bagong Taon.
An designated area man kan mga paratienda nin paputok makukua sa Public Market kan Libmanan sa Riverside.
Asin mga paratienda nag-agi nin inspections tanganing maasigurar an kasalbaduhan kan mga parabakal.
Dugang pa ni Maravilla na pigtukduan man an mga ini kan preparasyon asin mahigot na pigbabawalan ini na magpabakal sa mga menor de edad.
Sa ngunyan dae man nagtitinir sa sarong lugar an BFP Libmanan asin padagos ining naglilibot tanganing tolos na magkapagresponde enkaso may mangyaring emerhensiya.
