NAGA CITY- Ikukundusir sa aga December 31, 2025 an Thanksgiving Motorcade katakod kan ika-137th na kafiestahan kan Itom na Nazareno sa siyudad nin Naga.
Sa entrevista kan Bombo Radyo Naga ki Nico Sirios III, President kan Hijos de Nazareno Bicol Unit, Lerma, Naga City, sinaysay kaini na tuyong huring aldaw kan taon pigsasagibo an nasambitan ng Thanksgiving Motorcade.
Katakod kaini, alas 6 nin pagka-aga matipon na an mga Hijos asin deboto sa Holy Cross Parish para sa isasagibong motorcade prucession pasiring sa Palsong, Bula, Camarines Sur.
Pag-abot man sa Saint Joseph the Worker Parish magkakaigwa nin santa misa antes na magpasiring sa Holy Cross Parish Tabuco.
Piglalaoman na makakabot ini pasado 11-11:30 nin pagka-aga. Makalihis ini, kada igwang isasagibong misa magkakaigwa nin pahadok sa Imahae kan Itom na Nazareno asin magigin bukas ini sa publiko.
Mientrastanto, pigsaysay man ni Sirios na kan nakalihis na mga bulan, nagkaigwa na sinda nin pag-urulay para sa preparasyon kan dakulang kafiestahan kan Nazareno sa siyudad nin Naga.
Katabang kan simbahan an Regional Office kan PNP, Kabalikat, NCPO, PSO asin iba pang ahensiya sa pag-implementar kan paz y orden.
Piglalaoman man an pagdagsa kan mga deboto orog na ngunyan na mas kadakol an nakikisumaro sa siring na aktibidad.
Sa ngunyan, pig-enkaminar na sana ni Sirios an publiko na makisumaro sa mga aktibidad para sa kafiestahan kan Itom na Nazareno na mapuon sa aga asin madurar hasta ika-10 kan Enero.
