Inanunsyar kan Israel an pagsuspendir sa labi sa duwang dosenang humanitarian organizations na nago-operate sa Gaza Strip magpuon ngunyan na 2026 huli sa kabiguan soboot na sumunod sa bagong registration rules.
Sigun sa Israel, obheto kan bagong mga panundunan na mapugulan an Hamas asin iba pang militanteng grupo na makalaog an aid organizations.
Kabali sa mga sususpendiron iyo an operasyon kan saro sa pinakadakula asin bistadong international aid group na Doctors Without Borders asin Cooperative for Assistance and Relief Everywhere (CARE).
Alagad, nag angal digde an mga humanitarian organizations.
Para sa sainda, bakong makatuwiran an bagong registration rules asin nagpatanid na makakaapektar an panibagong pagbabawal sa pirang aid groups sa mga residentes kan Gaza na labi na nangangaipuhan nin humanitarian aid.
Sa irarom kaya kan bagong rules na inanunsyar kan Israel sa primerong parte kan 2025, minamandato an aid organizations na i-rehistro an mga pangaran kan saindang mga empleyado asin itao an mga detalye katakod sa pagpopondo asin saindang mga operasyon tanganing maipagpadagos ninda an saindang trabaho sa Gaza.
Enot na kayang inakusaran kan Israel an Hamas nin pagkua nin aid supplies, alegasyong parehas pinahimutikan kan United Nations asin man kan aid groups.
