Kinondenar ni ML Partylist Representative Leila de Lima an Estados Unidos sa iraraom ni Presidente Donald Trump huli sa soboot pagigin agresor kaini sa pangkinabang entablado, kasunod kan pag-atake sa Venezuela asin pagdakop ki President Nicolas Maduro.
Sigun sa lehislador, an insidenteng ini an nagpapaluya sa nag-iiral na rules-based international order asin nagtatalaan nin mapeligrong halimbawa kan nagtitinding agresyon kan mga makapangyarihang nasyon.
Binanggit ni De Lima na an siring na lakdang an nagn-normalize sa pananakop kan Russia sa Ukraine, agresyon kan China asin genocide kan Israel sa mga Palestino.
Pigbebweltada soboot kaini an pangkinabang kaayusan sa barbarikong prinsipyo kan “might makes right,” na pigwawasak an mga trayumpo kan United Nations puon pa kan matapos an ika-duwang Digmaang Pandaigdig.
Dugang pa kaini, komo kaalyado kan U.S. nawawara an moral na paninidugan kan Pilipinas sa pagtutol sa agresyon kan China sa West Philippine Sea.
Sinaysay ni De Lima na maski nagsusunod an nasyon sa ley internasyonal, nadadamay ini sa imahe kan U.S. na naggagamit man nin agresyon kontra sa mas sadit na nasyon siring kan Venezuela.
Nangapodan ini sa Kongreso na magsagibo nin halangkaw na lebel kan konsultasyon sa mga ahensiyang igwang koneksiyon sa pambansang seguridad tanganing magbilog nin komprehensibo asin estratehikong kasimbagan sa epekto kan agresyon kan mga superpower sa sitwasyon kan Pilipinas sa West Philippine Sea.
