Nagpakol sa 2,889 katao o 729 pamilya an pig ibakwar huli sa aktibidad kan Bulkang Mayon sa Albay, sigun ki Gobernador Noel Rosal ngunyan na aldaw nin Miyerkoles.
An mga ini an gikan pa sa apat na munisipalidad asin duwang syudad sigun ki Rosal.
Idinagdag man kaini na normal man an sitwasyon sa ngunyan, alagad kinakaipuhang iibakwar an mga nasa laog kan anom na kilometro permanent danger zone.
Siniguro ni Rosal na kayang simbagan an relief asin pangenot na pangangaipuhan kan mga evacuee dawa na maghaloy an pag ibakwar. Huli man sa mga resettlement program, nagbaba na an numero kan mga residente sa danger zone gikan sa haros 9,000 kan mga nakalihis na taon sa mas hababa sa 3,000 ngunyan.
Napakarhay na man an mga lakdang para sa salud asin sanitasyon sa mga evacuation center, kabali na an dakulang water containers asin pasilidad sa kalinigan. Itinaas man kan PHIVOLCS an Alert Level 3 sa Mayon kan Martes makalihis na mairehistro an pyroclastic density currents o “uson,” na nangangahulugang “high level of volcanic unrest.”
