Mahagad nin opisyal na kopya kan tinaguriang “Cabral files” an House Infrastructure Committee (InfraComm) gikan sa Department of Public Works and Highways, katakod kan imbestigasyon sa soboot katiwalian sa mga flood control project.
Sigun ki InfraComm co-chair asin Bicol-Saro Partylist Rep. Terry Ridon, pormal nindang pigrequest an mga dokumento sa masunod na semana, sa pagtubod na may sadiri pang kopya an DPWH dawa na naipasar na an mga ini sa Office of the Ombudsman kan Disyembre 23, 2025.
Piglinaw kan lehislador na an lakdang bako para pabulaanan an mga dokumentong pigluwas ni Batangas Rep. Leandro Leviste, kundi tanganing magkaigwa nin opisyal asin kumpletong rekord an komite, orog na suspendido an pagdangog kan InfraComm mantang umiiral an Independent Commission on Infrastructure (ICI).
Dugang pa kaini enkaso mabuwag an ICI, pupwedeng buhayon liwat kan tri-committee an imbestigasyon.
Mientrastanto, pigtawan duon ni Senior Citizens Partylist Rep. Rodolfo Ordanes an importansiya kan pagkakaigwa nin authentic na kopya kan mga dokumento tanganing dae ini magamit sa pangraraot sa siisay man na lehislador, asin pinahimutikan man an alegasyon na kaibahan an saiyang partylist sa mga nakareseber nin dakulang DPWH budget insertions.
Katakod kaini, pighahalat kan Kamara kun masunad nin ethics complaint an DPWH kontra ki Rep. Leviste, makalihis an report na soboot iligal kaining kinua asin pigkopya an mga dokumento kan nagtalikod sa kinaban na dating DPWH Undersecretary Catalina Cabral.
