Dae mababa sa anom na katawo an naireport na binawan nin buhay sa mahewasang pagguho kan basura sa Binaliw Landfill, mantang dose-dosena man an iba pang nawawara.
Pigkakarkulong 50 sanitation workers an natabunan kan Huwebes, Enero 8, kan magbagsak an basura gikan sa taas na pigkakarkulong katampad kan 20 palapag sa pribadong landfill na pigpapadalagan kan Prime Integrated Waste Solutiosn.
Presente man nagpapadagos an operasyon kan mga awtoridad kun saen naggagamit na an mga ini nin magagabat na makinarya, kaibahan an backhoes tanganing mahukay an mga natabunan.
Sigun ki Cebu Rescuer Jo Reyes, padagos an operasyon alagad paramientras ini nagpupundo kun naghihiro an landfill.
Pigkumpirmar man ni Cebu City Councillor Dave Tumulak, Chairman kan City Disaster Council, na nadugangan sa anom (6) an kumpirmadong gadan makalihis ma-recover an duwang hawak ngunyan na sabado mantang 32 katawo an presenteng nawawara.
Kaibahan an administrative offices asin staff housing sa natabunan kan basura na pigtutubudang dakol biktima an yaon duman.
Napagaraman na an Binaliw Landfill nagpoproseso nin poco mas o menos ng 1,000 tonelada kan basura kada aldaw asin nagse-serbisyo sa Cebu City magin sa hararaning komunidad.
