NAGA CITY – Gadan an sarong lalaki makalihis pagbabadilon sa banwaan nin BATO Camarines Sur.
Sa entrevista kan Bombo Radyo Naga ki PCPT. Mark Anthony Cledera Acting Chief of Police kan Bato Municipal Police Station pigsaysay kaining mag-oomagahon ngunyan na Enero 13, 2026 bandang alas 12:30 nagkaigwa nin shooting incident sa nasambitan na banwaan.
An biktima kan shooting incident si alyas Wawa 38 anyos residente kan Sitio Daang Bakal, San Rafael, Bato Camarines Sur kun saen may riding in-tandem na pinaputukan ini mantang nag-iinom sa gilid kan tinampo.
Susog sa imbestigasyon bandang 6:30 nin pagkaaga binawian na nin buhay an nasambitan na biktima.
Alagad sa ibong kan marekas na pagresponde kan mga otoridad, marekas man na nakatakas an duwang suspek gamit an saindang motorsiklo.
Patotoo man kan pamilya asin mga kabisto kan biktima na mayo man ining nakaalitan para maghantong sa siring kaidtong pangyayari.
Hiling man sa CCTV footage an pambabadil sa biktima alagad dae matukoy an pagkakakilanlan kan suspek huli ta malabo asin madiklom sa area kan pinangyarihan kan insidente.
Kaya padagos an pagbubusol kan mga otoridad orog na sa mga establishmento na mas paigtingon sa malinaw na footages kan mga CCTV Cameras.
Sa ngunyan padagos pa an pagkalap nin impormasyon kan mga kooperatiba tanganing matukoy an konkretong rason o ebidensiya kun ano an motibo sa biktima.
Pangapudan man ni Cledera na kun siisay man an posibleng testigo sa insidente makipagtabangan sana sa himpilan kan mga otoridad para mataan naman nin hustisya an nangyari sa biktima.
Asin pinag-iingat man kaini an mga residentes kan banwaan nin Bato, Camarines Sur tanganing malikayan an anuman na pangyayari.
