NAGA CITY- Padagos an pag-enkaminar kan Comelec Naga sa mga taga siyudad nin Naga na magparehistro sa nagpapadagos na Voter’s registration.
Sa entrevista kan Bombo Radyo Naga ki Atty. Maico Julia Jr, Election Officer kan Comelec Naga, sinaysay kaini na an nasambitan ng Voter’s registration an nagpuon kan nakalihis na Oktubre 20, 2025 asin madurar hasta Mayo 18, 2026.
Sigun pa sa opisyal, an lakdang na ini an komo preparasyon sa nararaning Barangay asin Sangguning Kabataan Election na naka-schedule sa November 2, 2026.
Katakod digde, pigsaysay kan opisyal na dae man maapektaran an aldaw kan eleksyon orog na ta ini an pigtakda kan batas.
Mientrastanto, nag-abot naman sa 2400 an running count kan Comelec Naga sa mga bagong botante asin piglalaoman na ini an madudugangan sa maabot na mga aldaw asin bulan.
Dugang pa ni Julia na padagos man an saindang pagkundusir nin Satellite Registration sa gabos na barangay kan Naga kun saen sa presente igwa na sanang 14 na dae pa natatapos asin target na makumpleto sa maabot na bulan nin Abril.
Sa ngunyan, hagad na sana ni Julia an kooperasyon kan gabos tanganing magin matrayumpo an nasambitan ng Voter’s registration.
