Sinentensiyahan kan sarong korte sa South Korea nin limang taong pagkakakulong si dating South Korean President Yoon Suk Yeol kasuodma, Enero 16, makalihis ining mapatotoohang nagkasala para sa kasong igwang kinaaraman sa obstruction of justice asin iba pang krimen katakod kan saiyang kontrobersiyal na deklarasyon kan martial law.
Sa desisyong ibinaba ni Judge Baek Dae-hyun kan Seoul Central District Court, napatotoohang nagkasala si Yoon sa pag-ulang sa mga imbestigador tanganing ini arestaron, siring man sa dae pag-iba sa nagkapirang miyembro kan gabinete sa sarong meeting katakod kan pagpaplano kan martial law.
Siring man, pinawarang-sala si Yoon sa kasong pamemeke kan mga dokumento huli sa kakulangan nin mga ebidensiya. Pigtawan man an dating Presidente nin pitong (7) aldaw tanganing magsunad nin apelar.
Enot nang pighagad kan mga prosecutors an 10-taong pagkakakulong ki Yoon asin padusang kagadan komo soboot pamayo kan sarong insurection huli sa pagpapautob nin martial law.
Sigun sa sainda, nararapat an pinakamagabat na padusa ki Yoon huli ta dae soboot ini nagpahiling nin anuman na pagbasol na nagbantang guluhon an nasyon.
Basado sa nagkapirang report, kapansin-pansin soboot an pagngirit ni Yoon sa laog kan hukuman mantang pigbabasa an hagad na death penalty kan prosecutors.
Nagtitinir man na matatag an paninindugan kan kampo ni Yoon na an pagdeklarar kaini nin Martial law an komo paggamit sana soboot nin emergency power kan presidente.
