Nagsunad si Senate Majority Leader Juan Miguel “Migz” Zubiri nin prosopwestong ley na obhetong i-reset an kaenot-enoteng parliamentary elections kan Bangsamoro Autonomous Region in Muslim Mindanao (BARMM) sa Marso 30, 2026.
Pigmungkahi kan Senate Bill No. 1587, an pag-amyenda sa Bangsamoro Organic Law (BOL) tanganing tawan-linaw an legal na basehan kan eleksyon asin itakda an pagpuon kan termino kan mga mahahalal na opisyal sa Abril 30, 2026.
Nakapalaman man digde an pagsasabay kan mga masunod na eleksyon sa BARMM sa pambansang halalan sa 2028 asin kada tolong taon pagkalihis kaini.
Sigun ki Zubiri, lampas anom na taon na an nakalihis puon kan maitatag an BARMM alagad dae pa liwat nakakaboto an mga namamawaan para sa sadiri nindang mga lider, bagay na salungat sa obheto kan sadiring pamamahala asin sadiring pagdedesisyon kan rehiyon.
Dugang pa kan senador na nagin kawsa kan pagkaantala an mga desisyon kan Korte Suprema na nag-hali sa Sulu komo parte kan BARMM asin nagbasura sa 2025 redistricting law kan Bangsamoro Parliament, na nagkawsa kan panibagong pagpreparar sa mga distrito asin istruktura kan halalan.
Sa irarom kan prosopwesto, matinir muna an Bangsamoro Transition Authority komo paramientras pamahalaan hasta sa mahalal asin matukaw an mga bagong opisyal sa paagi ka automated election.
