Piglatag ni Senate President Pro Tempore Sen. Panfilo “Ping” Lacson an mga napagtagumpayan kan saiyang pinangengenutang Senate Blue Ribbon Committee sa imbestigasyon sa maanomaliyang flood control projects kan gobierno.
Sa saiyang opening statement kasabay kan pagpuon kan pang walong pagdangog sa flood control anomaly kan hapon nin Lunes, Enero 19, pigsaro-sarong ipigmalaki ni Senator Lacson an mga nakamit sa imbestigasyon kaibahan an mga pagbuyagyag kan “key actors” sa flood control scam.
Sigun sa Senador, pigdangog asin pigtala kan komite an mga sinumpaang testimonya ninda Department of Public Works and Highways (DPWH) Bulacan District Engineer Henry Alcantara, Assistant District Engineer (ADE) Brice Hernandez, Jaypee Mendoza, asin kan iba pang tinaguriang “Bulacan Group of Contractors” o BGC boys, puon kan maibunyag an Bulacan 1st District Engineering Office komo sentro kan pinakadakulang saga kan korapsyon.
Dugang pa kan lehislador, sinundan man kan komite an bakas kan kwarta asin mga dokumento na nagbuyagyag sa hararom na network kan “in-house contracting,” “bid rigging,” “padded contract costs,” asin “license renting.”
Pigladawan kaini an mga scam komo “napakasistematiko”, na nagresulta sa mga substandard na imprastraktura asin ghost flood control projects asin napatotoohan man na an mga kaso sa Bulacan nagserbeng pintuan sana kan mas mahewas pang imbestigasyon.
Duon pa ni Sen. Lacson na isasagibo ninda an mga pagdangog nin may katarungan asin integridad, nakabase sa ebidensya, siringman dae sinda nagtatarget kan siisay man na partikular na tawo asin mayo man intensyon na pagtakpan an dawa siisay man.
Sa presente, may mga nakasakdal na sa Sandiganbayan asin sa mga korte kan nasyon. Dakol na man an nagsairarom sa preliminary investigations kan Ombudsman asin Department of Justice (DOJ), kaibahan an mga contractor asin haralangkaw na opisyal kan ehekutibo asin lehislatura, magin sa ibang sangay kan gobierno. Igwa na man pigsairarom sa Witness Protection Program (WPP) kan DOJ.
Pigkumpirmar man ni Sen. Lacson na dae mababa sa ₱21.7 bilyon an bank accounts asin iba pang mga pagsadiri an naka-freeze na sa irarom kan kasuguan gikan sa Court of Appeals.
Ipigmalaki man ni Senator Lacson na nagin dalan an mga pagdangog kan komite sa pagkakabuyagyag kan “conflict of interest” sa Philippine Contractors Accreditation Board (PCAB).
Nagin dalan man soboot an komite sa implementasyon kan “landmark transparency reforms” sa proseso kan pambansang pondo siring kan pag-livestream sa deliberasyon kan bicameral conference committee sa kaenot-enoteng pagkakataon.
Nag-abiso man an Senador sa mga nagdududa, detractors asin hijackers na nananamantala sa kaluyahan asin anggot kan publiko sa tahaw kan paggulong kan imbestigasyon.
