Nagsunad nin reklamong cyberlibel si House Deputy Speaker Ronaldo Puno kontra ki Cavite 4th District Representative Kiko Barzaga huli sa saiyang bribery posts sa social media.
Nag-ugat ini sa mga nagin pahayag ni Barzaga online na nagreseber soboot an saiyang kapwa lehislador gikan sa National Unity Party (NUP) nin suhol gikan sa business tycoon na si Enrique Razon para suportaran an speakership bid kaidto ni Leyte Representative Martin Romualdez sa pagbubukas kan 20th Congress.
Pigsunad ni Cong. Puno an reklamo kontra ki Barzaga sa Office of the City Prosecutor sa Antipolo.
Pighayag kan lehislador na igwang consequences an mga aksiyon orog na kun ini malisyoso asin malinaw na intensiyong atian an reputasyon nin mayong basehan.
Dugang pa kan kongresista na dae dapat na basta sana akusaran kan krimen an sarong indibidwal, ipangalandakan sa milyun-milyong tawo asin itago an mga kalokohan sa likod kan social media.
Katakod kaini, duon ni Puno sa saindang ipupursige an ganap na paninimbagan sa irarom kan ley.
Naenot na man nagsunad nin kasong cyberlibel si Razon kontra ki Barzaga katakod kan kaparehong alegasyon.
Mientrastanto, nakatalaang magpaso an suspensiyon ni Barzaga sa Enero 30 na nag-ugat sa saiyang “reckless asin inflammatory” socmed posts.
Nakaamba man na mapalawig pa ini kawsa kan panibagong reklamo kontra sa neophyte lawmaker.
