NAGA CITY- Nagbukas na an Farmers Corner sa 3rd floor kan Naga City People’s Mall kan nakalihis na semana.
Sa entrevista kan Bombo Radyo Naga ki Francis T. Abasola, Agricultural Technician kan City Agriculture Office Naga, sinaysay kaini na an mga produkto kan mga paratiendang gulay o paratanom nin gulay an pigdadara sa 3rd floor kan merkado publiko.
Sigun ki Abasola, obheto kan nasambitan ng lakdang na matawan nin opurtunidad an mga paragulay na mas magin madali an saindang pagpapabakal kan produkto.
Sa paagi kaya kan Farmers Corner, dae na masasakitan an mga consumer o parabakal na maghanap nin mga tindang gulay huli ta makukua na ini sa saro sanang lugar.
Mientrastanto, padagos man an pangapudan kan opisyal sa mga paratanom na tolos na magkua nin insurance kan saindang mga pananom sa Philippine Crop Insurance Corporation tanganing dae malugi.
Pigtawan duon ni Abasola na mayong nakakaaram sa mangyayari sa masunod na aldaw o bulan kun kaya mas marhay na igwang insurance na magagamit sa panahon kan pangangaipuhan.
Sa ngunyan, pig-enkaminar na sana kan opisyal an mga nagtatanom nin gulay sa siyudad nin Naga na magdulok sa saindang opisina enkaso igwang mga concern tanganing matabangan.
