NAGA CITY- Pigpaliwanag kan Department of Education an dapit sa pig-aapod na ARAL Program.
Sa entrevista kan Bombo Radyo Naga ki Atty. Salvador Bogs Pelingon, Division Information kan DepEd-CamSur, sinaysay kaini na an ARAL program o Academic Recovery and Accessible Learning Program kan DepEd susog sa RA 12028, sarong pambansang inisyatiba na obhetong simbagan an mga learning gaps asin pagbaba kan antas nin pagkanood kan mga estudyante puon Kindergarten hasta Grade 10, orog na sa Reading, Mathematics, asin Science.
Sigun ki Pelingon, nagpuon an programa sa pagtutok sa reading asin matematika tanganing masierto na an mga kaakian an preparado sa mas halangkaw na pag-aadal.
Pigsaysay kan opisyal na igwang mga estudyante an may problema pag-abot sa pagbasa asin comprehension kun kaya idinudugang an ARAL program tanganing mafocusan asin masimbagan an problema.
Pigkokonsederar ini komo intensive na interbensyon para sa pagsimbag sa nasambitan angat.
Dugang pa kan opisyal igwa ining kaibahan na summer program para sa mas halangkaw na pagkanood kan mga estudyante tanganing maasegurar na makakahabol an mga estudyante na nahuhuri sa klase asin makabilog nin mas pusog na foundational skills.
Prayoridad kan programa an low asin high emerging readers, siringman sa mga frustrated readers.
Mientrastanto, tanganing masierto man an kapreparaduhan, nagsagibo an DepEd nin pagsasanay para sa mga tutor, nagheras nin mga learning resource, asin piglunsar an ARAL School Readiness and Responsiveness Audit.
Sa ngunyan, pig-enkaminar na sana ni Pelingon an mga magurang na pakusugon an saindang papel sa pagsuporta sa pagkanood kan saindang mga aki komo dugang na lakdang sa pagprepar kan marhay na futuro para sa mga estudyante.
