NAGA CITY- Nag-abot na sa labi 2K an numero kan mga botante na na-deactivate sa banwaan nin Tinambac, Camarines Sur.
Sigun ki Kirk Thomas Tate, Election Officer kan Comelec-Tinambac, sinaysay kaini na kadalasan sa mga rason kun tano nade-deactivate an mga botante iyo an nagtatrabaho sa hararayong lugar, nagkaklase, nag-abroad kun kaya dae nakapagboto nin 2 magkasunudan na eleksyon.
Katakod digde, padagos an pangapudan kan opisyal sa mga botante na mag fill up liwat nin form asin magpa-reactivate tanganing makapagpartisipar sa borotohan.
Kadakol man na paagi an pigtatangro kan Comelec-Tinambac tanganing maenkaminar an mga residente kan saindang banwaan na magparehistro para sa isasagibong Barangay asin SK Elections.
Dugang pa ni Tate, nagpapadagos man an saindang satellitte registration kun saen sa mga masunod na aldaw asin bulan igwa nang naka-schedule na bibisitahong barangau tanganing idulok mismo an mga serbisyo na saindang pigtatangro.
Sa paagi kaini, mayo nang rason an mga tawo na dae nakapagparehistro para sa nararaning eleksyon.
Sa ngunyan, hagad na sana ni Tate an kooperasyon kan saindang mga nasasakupan tanganing maabot an saindang target na mga botante.
