NAGA CITY- Mawot na ipautob sa siyudad nin Naga an microchipping sa mga ataman na Ido.
Sa entrevista kan Bombo Radyo Naga ki Dr. Johann Sales, Head kan City Veterinary Office, sinaysay kaini na an microchipping sa Ido, an pagtatanom nin sarong sadit na electronic chip sa irarom kan u-nit kan hayop.
Ini igwang laog na permanenteng ID number na ini-scan kan mga vet o shelter tanganing mahanap an may-sadiri kun nawara an Ido.
Apwera pa digde, marhay man an microchipping tanganing makalikay sa paghahabon asin madali na masubaybayan an salud o anuman na namamate kan mga Ido.
Katakod digde, naghahalat na sana soboot an City Veterinary Office na makabakal nin microchip asin an pag-aadal kan mga proseso sa paggamit kaini.
Kaipuhan kaya na i-register an microchip sa sarong pet recovery database asin mantiniron na updated an impormasyon kan may-sadiri.
Dugang pa ni Sales na kamawotan kaya ninda na gabos na transakyon sa publiko an automated na.
Mientrastanto, apwera sa microchipping yaon man an paggamit nin dog tag, QR Code asin E-health card tanganing dae masakitan an mga dog owners na hanapon an saindang mga ataman enkaso nawara.
Sa ngunyan, padagos man an City Veterinary Office, sa saindang mga programa na makakatabang sa mga hayop sa bilog na siyuidad nin Naga.
