Aram baya nindo mga ka-bombo na pinag-uurulayan an sarong vlogger sa Guangdong makalihis iheras an proseso kan pag-extract kaini nin 191.73 grams na ginto gikan sa mga lumang sim cards asin iba pang electronic waste.
Gamit an complex chemical processes siring kan strong acid dissolution asin electrolytic reduction, nagibo kaining tunawon an mga scrap tanganing makua an ginto na nagkakantidad nin labi 120,000 yuan o pigkakarkulong P950,000).
Inapod kaini an proseso na “SIM alchemy”. Huli digde, kadakol na mga netizens an nagmawot na porbaran an proseso tanganing magyaman.
Siring man, nilinaw kan mga eksperto na “too good to be true” an video kun iisipon na gikan sana ini sa ordinaryong SIM cards.
An totoong gold content kan sarong SIM card an hababa sana (0.47 mg), kaya kakaipuhanon nin haros 400,000 pidaso tanganing makua an dakol kan gintong ipinahiling.
Inako man kinalaunan kan vlogger na naggamit ini nin mga gold-plated computer chips gikan sa mga electronic components siring kan nasa laog kan computer, cellphone, o servers na pigpapatos kan manipis na layer kan ginto.
Nagpatanid man an mga otoridad na dae ini pag-arugon sa harong huli ta naggagamit ini nin mga kemikal na nakakalason asin delikado sa salud asin kapalibotan.
