Iginigiit kan Philippine Institute of Volcanology and Seismology (PHIVOLCS) an kritikal na kahandaan kan mga Pilipino para sa “The Big One” asin posibleng tsunami, kasabay kan pagselebrar kan World Tsunami Awareness Day asin paggibo kan Fourth Quarter Nationwide Simultaneous Earthquake Drill (NSED).
Si DOST-PHIVOLCS Director Teresito Bacolcol nagtao doon sa pangangaipo na maging alerto an publiko, orog na an mga komunidad sa coastal areas, sa mga peligro kan tsunami na pwedeng idulot kan makusog na linog.
An mga panginot na natural na senyales na dapat tandaan iyo an makusog asin halawig na paglinog na maabot nin labi sa 20 segundo, kasunod kan paghiro kan mga active fault line.
Kaipuhan man na maging handa an publiko sa biglang pag-atras kan tubig-dagat o sa kakaibang ugong na hale sa dagat, na malinaw na tanda kan paparating na peligroso na tsunami wave.
Bilang paalala kan pamunuan, kaipuhan na mag-ebakwar tulos sa mas halangkaw na lugar o sa itinalagang evacuation zone sa oras na mapansin an mga ini, para masiguro an kaligtasan kan lambang pamilya.
Bilang suporta sa mga inisyatibang ini, ipinapatupad man an manlaen-laen na communication tsunami awareness programs asin nakatalaan an modernisasyon kan ahensya sa masunod na taon.
Kabali digdi an pagdugang nin 161 bagong kagamitan asin system-level monitoring tanganing salidahan an mga luma nang sistema para sa mas marikas na data processing asin pagpaluwas nin tsunami warning sa laog nin pirang minuto pagkatapos kan main shock.
