Mangyayari na an pagbweltada sa Pilipinas kan Filipino-American singer na si Jessica Sanchez para sa saiyang pig-aabangan na concert tour.
An “Jessica Sanchez Live In Manila” an gigibuhon sa Mayo 16, 2026 aldaw nin Sabado, sa Araneta Coliseum sa Cubao, Quezon City, basado sa naging kumpirmasyon kan Wilbros Live kan nakalihis na Miyerkules sa paagi kan sarong post sa social media.
Kan nakalihis na taon Setyembre 25 naging laog kan bareta asin ikinaogma kan saiyang mga fans an naging kapang-ganahan kan Filipino-American singer komo grand champion kan ika-20 edisyon kan “America’s Got Talent” (AGT).
Saro din ini sa mga naging kalahok kan inot na season kan nasambitan ng kompitesyon kun sain nagtapos ini sa semi-finals. Taong 2012, nagbali man si Sanchez sa ika-11 season kan “American Idol,” kun saan nakua kaini an second place, mantang kan sumunod na taon, iniluwas kaini an saiyang debut album na “Me, You & the Music.”
Nagluwas din ini sa seryeng “Glee.” Oktubre man kan nakalihis na taon sarong bulan antes an kapanganahan kaini sa “America’s Got Talent” ipinangaki kaini an saiyang inot na aking babae na si Eliana Mae Gallardo.
Mientrastanto Kan nakalihis na bulan nagluwas an bareta na nakatalaan na maluwas ini nin sarong album ngunyan na taon na mas urog pang nakapagtao nin excitement sa saiyang mga taga Suporta.
