NAGPATANID an Philippine Exporters Confederation Inc. (Philexport) kan Domingo na an nagdadakulang tensyon sa Middle East, kasunod kan mga pag-atake kan Estados Unidos asin Israel sa Iran asin an pagbalos kan Iran, pwedeng magkaigwa nin mahewas na epekto sa global supply chain. Sa sarong pahayag, sinaysay kan grupo na an mga pag-atake asin pag-target sa mga nasyon sa Middle east na may mga base militar kan Estados Unidos asin an pagsara kan Strait of Hormuz nagkawsa na nin pagkaantala kan airspace asin mga logistics, mantang nagpapakusog kan pagka-volatile sa mga energy market.
Dugang pa kan an grupo na an mas maluway na pagtalubo kan ekonomiya asin mas halangkaw na gastos pwedeng makaapektar sa mga dalagan kan komersyo sa bilog na kinaban. Para sa Pilipinas na nag-aangkat nin dakulang kantidad nin lana, an paglangkaw kan presyo kan krudong lana direktang makakadugang sa gastos sa produksyon, transportasyon asin logistics.
Segun sa Philexport, posibleng magpaluya ini sa price competitiveness kan mga produktong Pilipinas sa global market. Kabali sa mga sektor na pinaka-apektado iyo an mga electronics, garments, processed food asin furnitures, na pwedeng mag-atubang nin mas halangkaw na shipping rates, insurance premiums asin mas halawig na transit times kun an mga ruta mabago o ma-delay.
Ipigheras pa man kan grupo an mga nakaaging tensyon sa rehiyon na nagresulta sa mga surcharge sa kargamento asin seguridad—mga dugang na singil na pwedeng mamgyari giraray asin magpagabat sa komersyo asin turismo. An Philexport nagpatanid man kan posibilidad nin pagluway kan demand sa ibang nasyon, nin huli ta an pagka-volatile kan currency volatility asin inflationary pressures pwedeng makabawas sa paggastos kan mga konsumidores, orog na sa mga ekonomiya na nakadepende sa enerhiya sa Asya asin Europa.
Apwera kan bakong direktang epekto, an mga export kan Pilipinas sa mismong Middle East nagtitinir na vulnerable kun maglala an tensyon. Sa rason na ini, hinagad kan Philexport sa gobyerno na mahigot na bantayan an mga pangyayari asin pag-adalan an mga lakdang tanganing mabawasan an negatibong epekto sa mga exporters asin sa ekonomiya kan nasyon.
