Nakatala ang pinakamataas na bilang ng seismic activity sa Mayon Volcano nitong Sabado, 07 Marso 2026, ayon sa Philippine Institute of Volcanology and Seismology (PHIVOLCS), na patuloy na nagmamatyag sa aktibidad ng bulkan.
Ayon sa PHIVOLCS, umabot sa 82 ang bilang ng volcanic earthquakes na naitala noong Biyernes, na mas mataas kumpara sa mga naunang araw. Patuloy rin ang pag-agos ng lava sa mga gullies ng Basud, Bonga, at Mi-isi. Naitala rin ang 355 rockfalls at walong pyroclastic density current signals na dumadaloy patimog-kanluran ng bulkan.
Iniulat ng PHIVOLCS ang emisyon ng humigit-kumulang 7,633 toneladang sulfur dioxide, na maaaring magdulot ng malubhang epekto sa paghinga ng tao. Ipinagpapatuloy ang mahigpit na pagbabawal sa pagpasok sa anim na kilometrong permanent danger zone at sa paglipad ng mga sasakyang panghimpapawid malapit sa bulkan.
Samantala, ang Mount Kanlaon ay nakaranas ng pagbaba sa aktibidad matapos ang dalawang katamtamang pagsabog noong huling linggo ng Pebrero. Naitala ang anim na volcanic earthquakes sa Kanlaon, na nananatiling nasa Alert Level 2.
