Nakatagama na an Department of Social Welfare and Development (DSWD) para sa pag-abot kan Super Typhoon Champi, na inaasahang maglaog sa Philippine Area of Responsibility (PAR) ngunyan na semana, tanganing seguraduhon an tulos na ayuda sa mga posibleng maapektuhan na komunidad.
Segun sa DSWD, igwa na nin impresibong 4,571,390 family food packs (FFP) na nakaimbak sa saindang mga relief warehouse sa bilog na nasyon.
Dugang pa digdi, igwa man nin 344,942 non-food items (NFI) asin 204,745 ready-to-eat food packs (RTEFP) na nakatagama para sa tulos na distribusyon sa mga nangangaipo.
Ipinaliwanag ni DSWD Assistant Secretary Irene Dumlao na padagos na pinapangatamanan an aktibong suplay kan mga panginot na pangangaipo sa paagi kan mga strategic hub asin warehouse kan ahensya.
An sistemang ini nagseguro nin marikas na paghatod kan dugang na tabang sa mga komunidad na mangangaipo kaini.
Padagos man an produksyon kan mga family food pack sa mga panginot na production hub kan ahensya, bilang parte kan pinaigting na paghahanda sa posibleng epekto kan bagyo.
An mga lakdang na ini kan DSWD, segun sa ahensya, nakasuno sa direktiba kan Pangulo na seguraduhon an supisyenteng suplay kan mga panginot na pangangaipo.
Tuyo man kaini na marikas na maipamahagi an relief assistance sa panahon kan kalamidad.
Padagos man na sinusubaybayan kan ahensya an mga ulat kan Philippine Atmospheric, Geophysical, and Astronomical Services Administration (PAGASA) manungod sa hiro kan Champi.
Inaasahan na an Super Typhoon Champi posibleng makaapektar sa Hilagang Luzon, Cagayan Valley, asin hilagang parte kan Ilocos Region sa pagtatapos kan semana.
Base sa ulat kan PAGASA kan Domingo, alas-8 nin aga, namataan an super typhoon sa layong 2,145 kilometro subangan kan sur-subangan na Luzon, na nasa luwas pa kan PAR.
Taglay kaini an lakas kan duros na nag-aabot sa 185 kilometro kada oras asin pagbugso sagkod 230 kilometro kada oras.
