Nagsangat si Navotas Representative Toby Tiangco nin House Resolution (HR) 808 na naghahagad sa liderato kan Kamara na ipaapod an Committee of the Whole tanganing usisaon an status kan mandamiento de aresto laban ki dating Congressman Zaldy Co.
Naghahapot si Tiangco kung talagang hinahanap si Co nahiihling kaini na mayu man nin sense of urgency na hanapon, panimbagon si Co sa pagkaimbwelto sa corruption sa budget insertions sa flood control scandal.
Katuyohan man kan imbestigasyon na makabugtak nin magkakanigong lakdang tanganing marikas na madakop an mga napapaatubang sa mandamiento de aresto, lalo na kun yaon sa ibang nasyon.
Segun ki Tiangco, dapat man na malinaw na madeterminaran kun arin na ahensya an may pangenot na responsibilidad sa pag-implementar kan mandamiento de aresto, kabale na an koordinasyon sa mga dayuhan na hurisdiksyon asin pakikipag-ulay sa mga international law-enforcement agencies.
Kabali sa mga gustong ipaapod ni Tiangco sa hearing iyo an mga opisyales hale sa Department of Justice (DOJ), National Bureau of Investigation (NBI), Bureau of Immigration (BI), Ambassador of Portugal to the Philippines, asin an mga sekretaryo kan Department of Interior and Local Government (DILG) asin Department of Foreign Affairs (DFA).
