Ipigheras kan Envoy kan Iran sa United Nations (UN) na 1,332 na sibilyan an nagadan sa padagos na laban kan Iran sa Israel asin Estados Unidos, mantang rinibong iba pa an nalugadan.
Sinabi ni Iranian UN Ambassador Amir Saeid Iravani na kadaklan sa mga nagadan mga sibilyan asin nag-insistir na an Israel asin an Estados Unidos tuyong pigpupuntirya an mga sibilyan na imprastraktura.
Susog saiya, an Iran nagpupuntirya sana nin mga lugar militar sa mga pag’atake kaini.
Alagad, pinahimutikan ini kan US asin Israel asin sinabi na an Iran nag-aatake sa mga sibilyan.
Piglinaw man ni Iravani na dae pigtututukan kan Iran an interes kan mga pagtaraid na nasyon.
Sinabi niya na an saiyang gobyerno nag-iimbestigar kan mga bareta kan nagkapirang pag’atake na nagtama sa mga lugar kan militar kan Estados Unidos sa rehiyon kan Gulpo.
Posible na an nagkapira sa mga insidente an kawsa kan pag-intercept kan sistema nin depensa kan Estados Unidos na posibleng iyo an nag-divert kan mga missile sa saindang orihinal na target.
Mientrastanto, si Presidente kan Estados Unidos na si Donald Trump nag-apod para sa “daing kondisyon na pagsuko” kan Iran asin nag-insistir na an masunod na lider kan nasyon dapat na akoon pagkatapos kan paggadan ki Supremong Lider na si Ayatollah Ali Khamenei sa enot na aldaw kan gera.
Sinabi man ni Trump na gusto niyang magkaigwa nin papel sa pagpili kan masunod na lider kan Iran.
An Iran, alagad, nagkontra sa pahayag ni Trump asin nagsabi na ini pakikiaram sa mga panlaog na gibo-gibo kan saindang nasyon.
Segun ki Iravani, an pagpili kan masunod na lider kan Iran gigibuhon susog sa saindang konstitusyon asin sa kagustuhan sana kan mga taga-Iran.
Mientrastanto, pig-anunsyo kan presidente kan Iran na nagkapirang nasyon an nag-iinterbenir tanganing mapundo an ralaban.
Sa sarong separadong report, duwang opisyal kan Estados Unidos an nagsabi na an mga imbestigador nagtutubod na an mga pwersa kan Estados Unidos posibleng iyo an responsable sa sarong pag-atake sa sarong eskwelahan nin mga babae sa Iran na ikinagadan nin nagkapirang aki, dawa ngani an imbestigasyon dai pa nakaabot sa pinal na konklusyon.
