Nagpahayag nin pakikisumaro si Bise Presidente Sara Duterte para sa selebrasyon ngunyan na bulan kan National Women’s Month.
Sa saiyang pahayag, pigmidbid niya an kusog kan mga kababaihan na mapangganang nakalampas sa lambang suntok kan mga nakaaging krisis.
Saiyang sinabi na an mga kababaihan iyo an simbolo kan pusog na pundasyon kan nasyon bilang mga ilaw kan harong na tulos man minabangon pakatapos kan mga pag-atake asin iba pa.
Kasunod kaini, nangapudan asin inenkaminar man kan Bise Presidente an publiko na magkooperar sa pagtulod kan mas makusog na suporta para sa mga kababaihan na parte kan informal sector asin iba pang sektor kan sosyudad.
Sinabi niya na an mga kababaihan nangangaipo nin proteksyon para sa mga parte kan impormal na sektor, suporta sa klima para sa mga lokal na paraoma asin pagbukas nin access sa pagpinansya para sa mga babaeng negosyante.
Kasunod kaini, sinabi man kan Bise Presidente na an pagsuporta sa mga kababaihan bako sanang pagpapahiling nin marhay na boot kundi saro man na estratehiya sa pagtulod kan inclusive growth sa laog kan nasyon.
Katapustapusi, pig-engganyar man kan Bise Presidente an publiko na isulong an futuro kun saen an lambang babayeng Pilipina natatawanan nin pagkakataon na magin lider asin igwa nin mahiwas na oportunidad asin bako sanang responsibilidad.
