Natuklasan ng Armed Forces of the Philippines (AFP) na may mga pagtatangka ng pageespiya laban sa mga sundalo sa BRP Sierra Madre na naka-deploy sa Ayungin Shoal, West Philippine Sea, kung saan sinusubukang makuha ang impormasyon na maaaring gamitin upang ma-pressure ang kanilang mga pamilya.
Ayon kay Admiral Roy Vincent Trinidad, spokesperson ng AFP para sa West Philippine Sea, tinangka ng mga dayuhang handler sa pamamagitan ng mga lokal na contact na alamin ang mga detalye tungkol sa mga sundalo sa barko, kabilang ang posibleng impormasyon tungkol sa kanilang pamilya na maaaring gamitin upang impluwensyahan sila.
Naunang ibunyag ng National Security Council na tatlong Pilipino ang nasangkot sa pagbibigay ng sensitibong impormasyon sa mga dayuhan, kabilang ang posisyon ng pamahalaan sa West Philippine Sea at mga planong pang-depensa at diplomasiya.
Isa sa mga nahuling suspek ay isang sibilyan na may malapit na ugnayan sa isang opisyal ng Philippine Coast Guard na responsable sa rotation at resupply missions para sa mga sundalo sa BRP Sierra Madre.
Kasalukuyang may maliit na contingent ng Philippine Navy na naka-istasyon sa barko, na isinadsad sa Ayungin Shoal noong 1999 bilang pagpapatunay ng soberanya ng Pilipinas sa pinagtatalunang karagatan.
