Ipinahayag ng transport group na Manibela na maghahain sila ng petisyon sa Land Transportation Franchising and Regulatory Board (LTFRB) para sa piso hanggang dalawang pisong provisional fare increase dahil sa tumataas na presyo ng diesel na umaabot na sa halos 100 pesos kada litro.
Ayon kay Manibela Chairman Mar Valbuena, umaabot na sa halos 100% ang pagtaas ng petrolyo mula sa dating 55 pesos kada litro, na nagdudulot ng malaking lugi sa mga tsuper na nawawalan ng 400 hanggang 500 pesos kada araw. Dahil dito, maraming tsuper ang kusang tumitigil sa pamamasada, na nagbabanta sa operasyon ng pampublikong transportasyon.
Bukod sa krisis sa krudo, pinuna ng grupo ang hindi pantay na pamamahagi ng fuel subsidy at Assistance to Individuals in Crisis Situation (AICS), kung saan mas mataas ang ayuda sa modernized units kumpara sa tradisyonal na jeepney. Nahaharap din ang mga tsuper sa kalituhan at miscommunication mula sa Department of Social Welfare and Development (DSWD) at local government units (LGU), dahil hinihingan sila ng certification mula sa LTFRB na hindi naman sakop ang mga aktwal na driver.
Inirekomenda ng Manibela na gamitin ng gobyerno ang updated list mula sa mga samahan at TODA upang mas mabilis at patas ang pamamahagi ng ayuda. Bilang pangmatagalang solusyon, nanawagan din ang grupo sa gobyerno at mambabatas na suspindihin ang excise tax at VAT, at ibasura ang Oil Deregulation Law upang mapigilan ang labis na pagtaas ng presyo at pananamantala ng malalaking kumpanya sa gitna ng krisis.
