An kampo ni Senador Bato Dela Rosa nagtutubod na an isyu kan saiyang planong pag-aresto sarong “political circus” na nagmamawot ibaling an atensyon kan publiko hale sa mas importanteng problema kan nasyon.
Segun ki Atty. Israelito Torreon, legal counsel kan senador, dapat mas tutukan kan gobyerno an pagresolbar sa mga problema arog kan maanomalyang flood control projects asin ilegal na droga.
Idinugang niya na ini an mas importante kaysa sa Impeachment Trial kan bise presidente asin sa planong pag-aresto sa senador.
Padagos pa man giraray na pinaghahanap kan mga awtoridad ki Senador Dela Rosa puon kan maisyuhan siya nin “arrest warrant” hale sa International Criminal Court.
Siya an saro sa mga pinangaranan na “co-perpetrator” kaiba si dating Presidente Rodrigo Roa Duterte huli sa pagpautob kan madugong “war on drugs” kan nakaaging administrasyon.
Pareho nindang kinakaharap an kasong “crimes against humanity” sa International Tribunal, alagad an dating presidente sana an yaon sa The Hague, Netherlands.
