Sarong proponidong ordinansa an pigtutukar sa Sangguniang Panlungsod na nagmamawot na ma-streamline an sistema nin pag-hire nin mga job order (JO) asin mga contractual personnel sa lokal na gobyerno.
Sa intrevista kan Bombo Radyo Naga kay Naga City Councilor Atty. Oying Rosales, sinabi kaini na an propwestong ordinansa inaapod na Personnel Rationalization Ordinance of Naga City.
Susog sa proposal, an pag-hire kan JO asin COS limitado sana sa mga project-based, seasonal, o highly technical na mga trabaho. Dai na sinda tutugutan na ma-assign sa clerical asin routine tasks na dapat gibuhon kan mga regular na plantilla personnel. Nakalaag man sa ordinansa na maabot sa 10% kan total na workforce an pwedesir na kompuesto kan JO asin COS para maseguro na an mga core services kan gobyerno piggigibo kan mga regular na empleyado.
Susog sa administrasyon ni Mayor Lenny Robredo, saro sa mga mayor na obserbasyon kan ini magtukaw sa pwesto iyo an sobrang bilang kan mga JO asin COS na dai nakadestino sa mga specialized functions. Huli kaini, dakulang porsyon kan pondo kan syudad, haros 45% kan budget, an napapaduman sa personal na serbisyo o sweldo. Igwa nang mga instances kan mga nakaaging panahon na dakul na mga JO an na-hire dawa dae man nin naka-alokar na budget kaya dae tulos naswelduhan an mga empleyado.
Obheto kan ordinansa na merit-based an hiring process asin maibitaran an inaapod na political accommodation. An bill naghahagad man sa Human Resources Management Office na magsumiter nin taonan na plano sa rasyonalisasyon tanganing madeterminaran kun arin na mga posisyon an dapat na mamantenir, mabawasan, o ma-automate.
Sa ngunyan, pendyente an bill sa Committee on Organizational Development na pinangenotan ni Konsehal Gayle Abonal-Gomez. Piglalaoman na positibo an pagresponde kan Sangguniang Panlungsod sa nasabing ordinansa huli ta katuyuhan kaini na masierto an tamang paggamit kan pondo kan publiko asin maibitaran an labi-labing paggastos sa sweldo kan mga dai kinakaipuhan na personahes.
