Mas pinakusog kan mga awtoridad sa Naga City Police Office 4 an saindang preparasyon para masiguro an kaligtasan kan publiko sa maabot na summer vacation.
Sa entrevista kan Bombo Radyo Naga ki PLT Arlene Regachuelo, Assistant Station Commander kan Naga City Police Station 4, sinaysay kaini na haloy na nindang inaantisipar an pagdatong kan mga turista sa saindang nasasakopan. Bilang preparasyon, nagdeploy sinda nin mga police patrolers sa manlaen-laen na tourist attractions arog kan mga resort, waterfalls, asin mga salog para maseguro an seguridad kan mga bisita.
Kabali sa mga popular na lugar sa nasabing lugar iyo an Malabasay Falls asin Sulat Falls, apwera pa sa poco mas o menos limang iba pang bistadong waterfalls asin malinig na mga salog na paboritong destinasyon kan mga lokal asin turista.
May total na poco mas o menos 28 na personahes an pigdeploy bilang mga patrolers na nakadestino sa manlaen-laen na lokasyon. Padagos an saindang pag-ikot para magtao nin tulos na pagresponde sa anuman na insidente. Apwera kaini, pig-eenkaminar man an publiko na makipag-ulay sa police hotline enkaso nangangaipo nin tabang.
Sa ibong kan piglalaoman na paglangkaw kan mga tawo, sinabi kan mga awtoridad na mayo pang naitala na darakulang problema sa paz y orden. Sinabi man ninda na dakulang tabang an kooperasyon kan komunidad sa pagmantenir kan kaayusan.
Kasabay kan pagpreparar para sa summer vacation, nagkokoordinar man an kapulisan sa mga simbahan manungod sa mga aktibidad sa maabot na Semana Santa para masierto na organisado asin ligtas an mga ini.
Mientrastanto, nangapodan an pulisya na mag-ingat sa pagbyahe, likayan an marikas na pagmaneho, asin dae magmaneho kun nakainom nin arak. Inaabisuhan man an mga namamanwaan na magtipid sa mga gastos, kaiba na an paggamit nin gasolina, asin likayan an dai kinakaipuhan na mga byahe.
Bilang parte kan mga paghihingoa sa pagkonserba nin gasolina, an mga pulis nag-iimplementar nin vehicle sharing sa saindang mga operasyon sa pagpatrolya. Imbes na maggamit nin duwang motorsiklo, an mga personahes ngonian nag-iiribahan sa sarong behikulo tanganing makatipid sa gasolina.
Sa kabilogan, inasegurar kan Naga City Police Station 4 na padagos nindang papahingoson an saindang mga operasyon ngani na magin ligtas asin areglado an summer vacation kan publiko.
