Inalis sa puwesto ng Bureau of Fire Protection (BFP) ang lahat ng fire safety inspectors sa Metro Manila bilang bahagi ng malawakang reporma upang mapalakas ang transparency at integridad sa kanilang inspection system.
Iniutos ni BFP officer-in-charge Wilberto Rico Neil Ang Kwan Tiu ang mass relief noong Martes, kung saan piniling simulan ang hakbang sa National Capital Region dahil sa dami ng mga establisimyento at inspector sa lugar.
Ayon sa BFP, papalitan ang mga inalis na inspector ng mga kwalipikadong tauhan na hindi pa nagsisilbi sa naturang posisyon, batay sa kanilang training at service records. Maaari ring kumuha ng mga tauhan mula sa labas ng NCR kung kinakailangan upang mapunan ang kakulangan.
“If the BFP National Capital Region (NCR) lacks enough qualified personnel, personnel from outside NCR shall fill the gap,” ayon kay Kwan Tiu.
Nakahanay ang hakbang sa mga repormang ipinatupad ni Jonvic Remulla, kabilang ang paggamit ng body-worn cameras sa mga inspeksyon upang masiguro ang transparency at pananagutan ng mga opisyal.
Kinilala naman ni Kwan Tiu na maraming fire safety inspectors ang tapat sa kanilang tungkulin, ngunit iginiit niyang kinakailangan ang malawakang pagbabago upang matugunan ang mga sistemikong anomalya at makapagsimula muli ang ahensya.
Muling pinagtibay ng BFP ang kanilang pangako sa kaligtasan ng publiko sa pamamagitan ng mahigpit at patas na pagpapatupad ng fire code.
Ang hakbang ay kasunod ng pagkakasuspinde kay dating BFP chief Jesus Fernandez kaugnay ng alegasyon ng graft at corruption, kabilang ang umano’y ₱14.7 milyong kickback sa procurement ng ambulansya noong 2024.
