Umabot sa 387 gasolinahan sa buong bansa ang pansamantalang nagsara mula Marso 1 hanggang Abril 9, ayon sa Philippine National Police (PNP), habang 17 kaso at 42 indibidwal naman ang nasangkot sa iba’t ibang paglabag kaugnay ng suplay at kalakalan ng langis.
Sa ulat ng PNP, ang mga pagsasara ay dulot ng hindi pagdating ng suplay ng petroleum products mula sa kabuuang 14,519 na fuel stations sa bansa. Sa pakikipagtulungan sa Department of Energy (DOE), patuloy ang pagbabantay ng pulisya upang matiyak ang sapat na suplay at maiwasan ang iligal na gawain.
Kabilang sa mga paglabag na tinutukan ng mga awtoridad ang hoarding, profiteering, oil pilferage, estafa, theft, at paglabag sa Presidential Decree 1865. Dahil dito, nakapagsampa na ng 17 kaso at nakapaghuli ng 42 suspek ang PNP.
Ayon kay PNP Chief Police General Jose Melencio C. Nartatez Jr., tuloy-tuloy ang kanilang operasyon upang maprotektahan ang publiko at matiyak ang patas na kalakalan sa sektor ng langis.
Isa sa mga malaking operasyon ang isinagawa noong Abril 8, 2026 sa San Pablo City, Laguna, kung saan nahuli ang ilang indibidwal na sangkot sa oil pilferage. Nakumpiska rin ang mga produktong petrolyo at kagamitan na nagkakahalaga ng mahigit ₱3.5 milyon.
Bahagi ang mga hakbang na ito ng pinalakas na kampanya ng PNP sa ilalim ng kanilang Focused Agenda sa Enhanced Managing Police Operations upang agarang matugunan ang mga isyu ng publiko.
Hinihikayat naman ng PNP ang publiko na agad iulat ang anumang kahina-hinalang aktibidad kaugnay ng suplay at presyo ng langis sa pinakamalapit na himpilan ng pulisya, sa Unified 911, o sa kanilang mga opisyal na hotline.
Iginiit ng PNP na mahigpit nilang ipatutupad ang batas laban sa mga lalabag, bilang suporta sa programang “Bagong PNP para sa Bagong Pilipinas: Serbisyong Mabilis, Tapat at Nararamdaman.”
