Ipinatupad na kan LGU-Naga an mas mahigot na patakaran sa paggamit kan mga behikulo asin konsumo nin enerhiya bilang parte kan pagpapakusog nin disiplina asin pagtitipid sa gastos. Segun ki Naga City Mayor Lenir Robredo na sa laog kan bagong sistema nin fleet management, an gabos na yabe kan mga behikulo kan syudad yaon na sa pangangasiwa kan General Services Office (GSO).
Huli digdi, dai na libre an mga opisyal na gamiton an mga sarakyan kan syudad nin walang tamang pahintulot. Kinakaipuhan na magtao nin malinaw na paliwanag o justification antes makagamit nin behikulo. Kasabay kaini, ipinapatupad man an carpooling tanganing mabawasan an bilang kan mga behikulo na ginagamit sa mga opisyal na lakaw.
Ipinagbawal man, bilang pangkagabsang patakaran, an mga biyahe sa luwas kan syudad, apwera na sana kun ini an importenteng madumanan. Pig-untok na man an dating nakaugaliang pagpapasubli kan mga behikulo kan syudad para sa manlaen-laen na aktibidad, siring an mga okasyon sa barangay.
Sa irarom kan bagong patakaran na nakabatay sa direktiba kan DILG, sa mga situwasyong may sertipikadong emergency sana pwedeng ipasubli an mga behikulo. Halimbawa, an paggamit nin ambulansya para sa mga medikal na biyahe, kinakaiphan na may certification gikan sa doktor na ini an tunay na emergency.
Mientrastanto, mahigot man na minomonitor kan Internal Audit Services (IAS) an fuel consumption kan mga behikulo tanganing masierto na tama na paggamit kan pondo. Maski dai pa kumpleto an report ta dai pa man nakakaabot nin sarong bulan an implementasyon, nilalaoman na an mga pagbabago na ini magkawsa nin dakulang pagtitipid.
Apwera digdi, pinapakusog man an kampanya sa pagtitipid nin kuryente sa laog kan City Hall. Maski maray pa an kasalukuyang konsumo, ipigpuunan na an regulasyon sa paggamit kan mga air conditioning unit tanganing maiwasan an posibleng pagtaas nin gastos, lalo na sa fuel.
Target kan mga bagong lakdang na ini na mapakarhay an pamamahala kan mga resources kan syudad asin maseguro an mas episyenteng serbisyo para sa mga tawo.
