Hiniling ng pamahalaan ng Philippines sa pamamagitan ng Department of Foreign Affairs na alisin ng Oman ang requirement na negative-HIV certificate para sa mga Pilipinong may work visas na papasok sa bansa.
Ayon sa DFA, nagsagawa sila ng “strong representations” sa Embahada ng Oman sa Maynila upang alisin ang naturang rekisito para sa mga Pilipinong magtatrabaho sa nasabing bansa.
Nilinaw naman ng Omani Embassy na ang HIV certificate requirement ay para lamang sa mga turistang gumagamit ng visa-free entry, at hindi para sa mga may work visa.
Dagdag pa ng embahada, kasalukuyang nirerebyu ng gobyerno ng Oman ang naturang polisiya at nakatakda silang magpulong sa susunod na linggo upang talakayin ito.
Umaasa ang DFA na magiging positibo ang resulta ng usapin dahil sa matibay na ugnayan ng Pilipinas at Oman, lalo na sa larangan ng paggawa at migrasyon.
Samantala, nagpaalala ang ilang airline, kabilang ang Emirates, na may umiiral na requirement sa HIV test certificate para sa mga Pilipinong papasok sa Oman, at hinihikayat ang mga biyahero na makipag-ugnayan muna sa kanilang airline para sa pinakabagong travel guidelines.
Patuloy na binabantayan ng pamahalaan ng Pilipinas ang usapin upang matiyak na hindi maaapektuhan ang paglalakbay at trabaho ng mga Overseas Filipino Workers (OFWs).
