Sinabi ni Senate President Pro Tempore Panfilo “Ping” Lacson na may ilang grupong umano’y nagtatangkang humingi ng suporta mula sa uniformed services para sa posibleng military-backed “People Power revolution,” ngunit malabo aniya itong magtagumpay.
Ayon kay Lacson, nakatanggap siya ng impormasyon na may ilang retiradong opisyal na nagsisikap mangalap ng suporta mula sa loob ng Armed Forces of the Philippines (AFP).
Aniya, ang mga umano’y nagtatangkang kumalap ng suporta ay nasa labas ng AFP, at kung mayroon mang nasa loob, iilan lamang ang nahikayat na sumama sa naturang grupo.
Dagdag pa niya, batay sa kanyang mga contact sa Philippine National Police (PNP), wala siyang nakikitang senyales na lalaki o “snowball” ang naturang kilusan.
Naniniwala rin si Lacson na maliit ang tsansa ng ganitong hakbang dahil nananatiling propesyonal ang AFP.
Giit niya, hangga’t nananatiling professional ang sandatahang lakas, walang mabigat na dahilan upang magkaroon ng military junta o panibagong People Power revolution.
Si Lacson ay nagsilbi sa uniformed service mula 1971 hanggang 2001 sa parehong AFP at PNP, at naging PNP chief mula 1999 hanggang 2001.
Noong nakaraang taon, tinutulan din niya ang ideya ng military-backed “reset” o junta sa gitna ng galit ng publiko sa mga usapin ng korapsyon, at iginiit na dapat manaig ang pananagutan nang hindi isinasantabi ang 1987 Constitution of the Philippines.
Binigyang-diin din niya na sa ilalim ng Konstitusyon, nagtatapos sa House Speaker ang linya ng presidential succession.
Dahil dito, inihain niya ang Designated Survivor Bill na naglalayong palawakin ang succession line upang maisama ang pinaka-senior na miyembro ng Senado at Kamara.
