Naglabas si dating AnaKalusugan party-list Rep. Mike Defensor ng isang audio recording na umano’y naglalaman ng pahayag ng “surprise witness” na si Orly Guteza, kung saan sinasabi nitong pinilit siyang baguhin ang kanyang affidavit kaugnay ng kontrobersiyal na isyu ng umano’y pagdadala ng pera sa tirahan ni dating House Speaker at Leyte Rep. Martin Romualdez.
Sa audio clip na ibinahagi sa social media, maririnig si Guteza na kausap ang kanyang asawa at isinasalaysay na pinipilit umano siyang magsumite ng bagong affidavit na taliwas sa kanyang naunang testimonya sa Senate Blue Ribbon Committee.
Ayon sa recording, sinabi ni Guteza na may mga idinagdag umano sa kanyang pahayag na hindi totoo, kabilang ang alegasyong idinidiin sina Defensor at Marcoleta. Binanggit din niya na isinama sa bagong statement ang umano’y pangakong pera sa kanya at ang pag-amin na wala siyang kaalaman sa sinasabing pagdadala ng pera sa bahay ni Romualdez—mga detalyeng aniya’y hindi niya sinabi.
Ipinahayag ni Defensor na ang naturang audio ay naitala umano ng asawa ni Guteza gamit ang cellphone. Gayunpaman, wala pang opisyal na beripikasyon sa pagiging tunay ng nasabing recording.
Bukod dito, inilabas din ni Defensor ang kopya ng umano’y reklamo sa Ombudsman laban kay Romualdez kaugnay ng isyu sa flood control projects, na sinasabing nakabatay sa affidavit ni Guteza. Nilinaw naman na hindi pa pormal na naihahain ang naturang reklamo.
Nanawagan din si Defensor kay Ombudsman Jesus Crispin Remulla na ilagay sa protective custody si Guteza at ang kanyang pamilya, dahil sa posibilidad na nasa panganib ang mga testigo sa kaso. Sa ngayon, wala pang tugon ang kampo ni Remulla hinggil dito.
Matatandaang humarap si Guteza bilang “surprise witness” sa pagdinig ng Senate Blue Ribbon Committee noong Setyembre 25, ngunit hindi na ito muling nakita matapos ang naturang pagdinig.
Samantala, nauna nang itinanggi ni Romualdez ang mga paratang at tinawag itong “kasinungalingan” at “fabrication.” Aniya, imposibleng naganap ang umano’y pagdadala ng pera sa kanyang tirahan sa Makati dahil ito ay sumasailalim sa renovation at walang nakatira roon maliban sa mga construction worker.
