Nakarekord nin dakulang paglangkaw sa benta an Feria De Camarines Featuring Delicioso trade fair makalihis na maabot an nasa ₱5.1-M na kita sa laog nin limang aldaw, gikan sa nakaaging average na ₱2-M—katumbas nin 155% na paglangkaw.
Sa intrevista kan Bombo Radyo Naga ki Jay Percival Ablan (Provincial Director, Department of Trade and Industry – Camarines Sur), 150 MSMEs na nakatutok sa food products an nagpartisipar, mantang an aroaldaw na foot traffic uminabot sa 15,000 hasta 20,000 sa weekends, kun saen 50% hasta 60% kan mga bisita an aktibong namamakal sa peryahan.
An pinatuyong sira, prosesong karne, asin lana nin niyog iyo an mga pinakamabenta, na nagin popular huli sa libreng mga sampol, pinauswag na pakete, asin pagigin sarong pundamental na pangangaipo kan mga konsumidor.
Dugang pa ni Ablan, dakula an tabang kan trade fair sa pagtalubo kan MSMEs, sa pagbangon kan mga negosyong apektado kan pandemya, asin sa pagpahiwas kan merkado sa paagi nin bulk order hale sa manlaen-laen na institutional buyers.
An paggibo nin produkto asin pagmarka padagos na papakusugon tanganing mamantenir an pagtalubo kan sektor.
