Nag-atendir sa plenaryo kan Kamara si Leyte 1st District Representative Martin Romualdez sa ibong kan mga nagpapadagos na isyu may kinaaraman sa anomalous flood control project.
Si Romualdez naheling na aktibong nagpartisipar sa sesyon kan Kamara kun sain sinabat siya kan nagkapirang kapwa mambabatas sa laog kan plenary hall.
Sa ibong kan mga isyung pigtutulod, saro sa mga mayor na ley na saiyang pigtutulod iyo an House Bill 8466 o an National Land Use Act, na inaprobaran na sa ikatolo asin huring pagbasa kan Lower House of Congress.
Katuyuhan kan bill na magbugtak nin komprehensibong plano sa paggamit kan daga sa nasyon tanganing mapakusog an seguridad sa pagkakan, mapakarhay an preparasyon sa kalamidad, asin masimbagan an mga problema sa harong asin imprastraktura.
Segun ki Romualdez, reporma an nasabing bill ngani na pagsararoon an magkasuhay asin magkakontrahan na polisiya sa paggamit kan daga sa manlaen-laen na sektor.
