Nangangapudan an mga kongresista na miyembro kan Makabayan Bloc sa administrasyon asin sa gabos na nanonongdan na ahensya na arestaron tulos si Senador Ronald Bato Dela Rosa sa irarom kan warrant of arrest kan International Criminal Court o ICC.
An pangapodan na ini ginibo kan mga Representantes Antonio Tinio, Sarah Jane Elago asin Renee Louise Co matapos na ibasura kan Korte Suprema an kahagadan ni Dela Rosa na pugulan an saiyang pagdakop.
Segun sa Makabayan Bloc, tinatawan duon kan desisyon kan Korte Suprema na dae dapat ulangon an progreso kan hustisya sa paagi nin mga petisyon sa korte asin pagmaniobra gamit an mga teknikalidad.
Orog pang tinawan duon kan mga solon kan Makabayan na minalataw ngonian na sarahotan na sana an argumento kan lado ni Senador Bato na kaipuhan an mandamiento de aresto hale sa sarong local na corte ngani na isagibo an saiyang pagdakop.
Huli kaini, pig-engganyar kan Makabayan Bloc si Dela Rosa na magsuko na asin atubangon an kasong crimes contra humanidad na isinangat sa ICC.
