Nagbabala ang isang legal expert na maaaring maharap sa pananagutan si Senador Robin Padilla kaugnay ng paglabas ni Senador Ronald dela Rosa mula sa Senado habang isinasagawa ang operasyon ng National Bureau of Investigation para ipatupad ang arrest warrant ng International Criminal Court.
Ayon sa ulat, handa si Padilla na sumailalim sa imbestigasyon at iginiit na wala siyang ginawang ilegal sa insidente, at sinunod lamang nila ang umiiral na patakaran ng Senado hinggil sa koordinasyon at pangangailangan ng court order bago ang anumang pag-aresto.
Matatandaang nauwi sa tensyon ang insidente matapos tangkain ng NBI na ipatupad ang ICC warrant laban kay Dela Rosa, na nasa ilalim ng Senate protective custody. Dahil dito, lumutang ang usapin kung may naganap na obstruction of justice at kung sino ang dapat managot.
Sa ilalim ng Presidential Decree 1829, maaaring makasuhan ang sinumang tumulong o kumupkop sa isang indibidwal upang makaiwas sa pag-aresto. Gayunman, hati ang mga legal expert kung saklaw nito ang ICC warrant o limitado lamang sa domestic criminal cases.
May mga nagsasabing maaari ring umabot ang pananagutan sa iba pang opisyal ng Senado, depende sa magiging desisyon ng korte at sa interpretasyon ng mga awtoridad sa naging insidente.
