Nagpatanid si National Bureau of Investigation Director Melvin Matibag laban sa kagustuhan kan senado na magin pailihan kan mga dulag.
Ini makalihis na tinugutan kan Senado na makadulag si Senador Ronald Dela Rosa na may mandamiento de aresto hale sa International Criminal Court.
Dugang pa kan hepe kan NBI na kun gigibuhon ini kan Senado, delikado asin makakaraot sa tiwala kan publiko.
Maraot man ini sa imahe kan Senado ta gari nagiging sirongan o pailihan na sinda kan mga nag-aatubang nin kaso.
Magigirumduman na dawa nagtao nin asigurasyon an Senado na kukuanon ninda si Dela Rosa sa protective custody asin itatao sa mga pulis, pinabayaan ninda ini.
Mientrastanto, Anom pang personalidad an masunod ki Sen. Bato dela Rosa na tatawan nin mandamiento de aresto kan International Criminal Court (ICC) na iluluwas sa mga masunod na aldaw.
Ini an ipinahayag ni National Bureau of Investigation (NBI) Director Melvin Matibag na nagsabi man na pigkokonsiderar ninda na ‘test case’ para sa saindang mga operatiba an pagkadakop ki Bato.
Si Dela Rosa, dating hepe kan PNP, pigkokonsiderar na chief architect kan madugong drug war ni dating Presidente Rodrigo Duterte mantang an anom pang prominenteng personalidad an suboot imbwelto man sa extra judicial killings (EJK) sa drug war.
Segun ki Matibag, dae mahahaloy mahuhulog man si dela Rosa sa kamot kan mga operatiba kan NBI huli ta igwa na sindang sinusundan na lead pasiring sa saiyang tagoan.
